43 menor nasakpan sa CAIB nga nag-inom sud sa imnanan
CEBU, Philippines — Duha ka balay kahilayan ang nasakpang nakalapas sa ordinansa sa dakbayan sa Sugbu atol sa gihimong kinalit nga inspeksyon sa City Anti Indecency Board (CAIB) diha sa Osmeña Blvd. ug Maria Christina Street sa uptown area sa Dakbayan sa Sugbo sa nakalabay nga gabii.
Ang CAIB nihimo og surpresang inspeksyon sa duha ka establisamento ug ang usa nasakpan nga nakalapas sa City ordinance No. 1413 o Liquor Licensing Ordinance.
Base sa maong ordinansa bawal angmga beer houses, karaoke lounge, bars sa duol sa mga tulonghaan o simbahan ug gidili ang pagbaligya og bino sa mga menor de edad.
Atol sa pagsusi nga gipangulohan ni CAIB Executive Director Dr. Lucelle Mercado, ang establisamento diha sa Maria Christina nasuta nga adunay 43 ka mga menor de edad nga nag-inom.
Ang tag-iya sa maong balay patigayon posible nga makamulta tungod niini.
Samtang ang establisamentong giadto sa CAIB diha sa Osmeña Blvd. nasuta nga expired usab ang mga permits.
Ang inspeksyon sa CAIB gikuyogan sa BPLO, Liquor Licensing Division sa Cebu City, ug kapolisan.
Ang report sa joint team iduso kini nila ngadto sa buhatan sa City Treasurers Office nga mao nay mopatawag sa mga nakalapas sa ordinansa. (BANAT NEWS)
- Latest
