Tulo sa upat ka lalaki nga nagdala ug nanion og pusil nailhan na
CEBU, Philippines — Gibutyag ni Police Major Nolan Tagsip, tigpamaba sa Cebu Police Provincial Office (CPPO) nga nailhan na ang tulo sa upat ka lalaki sa nikatap nga video nga nakuha sa kapolisan diin nagdala-dala kini og armas, giingong nanion ug namatid diha sa Barangay Tapon, Lungsod sa Dumanjug.
Ang maong insidente nahitabo usa ka adlaw sa wala pa ang Barangay ug Sangguniang Kabataan Elections 2023.
Ang BSKE gipahigayon kini niadtong Oktubre 30, 2023.
Matud ni Tagsip nga ang mga reklamante nakadesidir nga mokuha og ilahang abogado ug sa oras sa pagsuwat niining balita anaa na sila sa proseso sa pagkompleto sa mga gikinahanglan nga mga dokumento.
As soon as ma-complete sa ilang private lawyer ang affidavit of complaint, affidavit of witness they will endorse it to the Dumanjug Police Station next week ila naning maduso sa piskalya , butyag ni Tagsip.
Tulo ka kaso ang gikatakdang ipasaka batok sa maong mga lalaki nga gilangkuban sa grave threat, physical injuries ug kalapasan sa Akta Republika 10591 kun The Comprehensive Firearms and Ammunition Regulation Act subay usab sa Comelec gun ban.
If ma-file na ang case then atong mga suspects motubag sila and then dayon ang answer i-valuate sa piskal if naay probable cause iakyat sa piskal ngadto sa judge and then sa court will issue warrant of arrest , pasabot ni Tagsip. Base sa taho sa kapolisan nga apil sa insidente ang incumbent official kinsa nakadaog usab sa nilabay ng eleksiyon sa barangay isip barangay councilor. (BANAT NEWS)
- Latest
