"Goons" gisusi sa CPPO

CEBU, Philippines — Nagpadala og dugang police ang Cebu Police Provincial Office (CPPO) sa Barangay Bulasa sa Lungsod sa Argao ug sa Barangay Tapon sa Lungsod sa Dumanjug gumikan sa isyu sa harrassment ug giingong presensiya sa mga armadong tawo sa lugar.

Matud ni Police Major Nolan Tagsip, Information Officer sa Cebu Police Provincial Office nga nihimo sila og hot pursuit operation gumikan sa gikatahu nga armadong tawo sa Barangay Tapon kagahapon sa kadlawon nga nakuhaan og video ug nag-viral sa social media dihang gi-post sa Facebook account nga Tapon Unya.

Sigon ni Tagsip upat ka biktima ang nanawag sa police station human giiingong upat ka tawo ang nanion nila og armas ug gituohan nila nga tawo kini sa kaatbang nga kandidato.

Nailhan na nila matud pa ang duha sa upat ka mga suspek pinaagi sa video nga ilang nakuha.

Samtang sa Barangay Bulasa sa Lungsod sa Argao nihimo na sab og imbestigasyon ang kapolisan sa giingong harrassment incident ug pagpamato sa usa ka grupo nga matud pa kaalyado sa usa ka kandidato.

“We encourage the witness nga kung naa man gyuy ingon ani nga panghitabo to come into surface aron maimbestigahan ug ma identify nato if ever naa man gani”, suma pa ni Major Tagsip.

Sa laing bahin moabot sa 29 ka mga indibidwal ang nadakpan sa mga tinugyanan sa balaod gumikan sa kalapasan sa liquor ban nga gipatuman gikan sa Oktubre 29 hangtud sa petsa 30.

Suma ni Police Lt. Col. Gerard Ace Pelare, tigpamaba sa Police Regional Office (PRO)-7 ang mga nadakpan nga milapas sa liquor ban nag-inom sa mga pampublikong lugar ug sa mga imnanan sa Probinsiya sa Bohol, Probinsiya sa Sugbo ug dakbayan sa Sugbo.

Nagpatrolya ang kapolisan aron masiguro gyud nga napatuman ang liquor ban nga nahuman alas 12 sa tungang gabii.

Si Atty. Lionel Marco Castillano, Regional Director sa Commission on Elections Central Visayas nga usa kini ka election offense ug ang mga nadakpan posibleng magpriso sulod sa usa ngadto sa unom ka tuig.  Gawas niini, manubag usab ang mga establisamento nga naninda og ilimnong makahubog bisan og gipatuman ang liquor ban. (BANAT NEWS)