Lalaki nga nanion og armas nisurender kang Chan

CEBU, Philippines — Usa ka lalaki kinsa giingong nanion og armas ang nitahan sa iyang kaugalingon kagahapon human nimando si Mayor Junard ‘Ahong” Chan sa kapolisan sa Dakbayan sa Lapu-Lapu niadtong adlaw’ng Domingo nga tabangan siya sa pagsikop sa maong lalaki.

Matud ni Chan nga adunay concern citizens ang nagpaabot ngadto kaniya sa video sa maong lalaki pinaagi sa social media.

Si Chan nagkanayon nga ang mga badlongon ug abusado nga sama sa iyang nakita sa video wala kini lugar sa ilang siyudad diin iyang gipaningkamotan nga mahimong luwas ang siyudad.

Gibutyag ni Chan nga tungod sa maong post niya wala ray napulo ka oras nitahan ang maong lalaki diha sa iyang buhatan.

Si Chan nagkanayon nga kong adunay problema mahimo kining estoryahon sa hinay ug adunay balaod nga angayang subayon ug dili magpadala sa init sa ulo.

Ang maong lalaki mag-atubang kini og kaso sa nahimo niya nga kalapasan.

Ang kapolisan sa Dakbayan sa Lapu-Lapu mohimo usab sa pagpalalom sa ilang imbestigasyon subay sa balaod. (BANAT NEWS)