Walo ka barangay sa Cebu City dunay kaso sa rabies

CEBU, Philippines — Ang Department of Veterinary Medicine Fishes (DVMF) mibutyag nga walo ka mga barangay sa Dakbayan sa Sugbu ang kompirmadong adunay kaso sa rabies ug gitinguha nila nga dili na kini mapun-an pa karong tuiga ug sa pagabot sa tuig 2030, rabies-free na ang siyudad.

Si City Veterinarian Dr. Jessica Maribojoc sa gipagawas nga impormasyon sa City’s News and Information team, miila sa walo ka barangay nga mao ang Inayawan, Guadalupe, Pit-os, Kinasang-an, Lahug, Tisa, Tejero ug Punta Princesa.

Hinuon mas gamay ang mga kaso sa rabies karong tuiga kun itandi sa nakalabay nga mga tuig. Niadtong 2021 mao ang dunay pinakadaghang kaso sud sa nakalabay nga unom ka tuig kay 28 ka barangay ang dunay natalang kaso sa rabies.

Si Dr. Maribojoc miingon nga gipangusgan nila ang anti-rabies vaccination campaigns aning mga barangaya aron dili na mapun-an pa.

“Dili ta mubalhin ana na barangay or ana nga sitio until wala ta n mahuman tag bakuna,” ni Marobojoc pa.Samtang nagpadayon sab ang uban pa nilang serbisyo para sa mga binuhi sama sa purga, kapon ug ligation, bitamina, konsultasyon ug microchipping. — /IBM (BANAT NEWS)