Okopante sa 93-1 lot sa probinsiya ni-enrol na sa Pag-Ibig

CEBU, Philippines —  Nang-enroll na ang mga okupante sa 93-1 lots sa Probinsya sa Sugbo ug sa Alliance of Barangay Apas Community Associations Inc. (ABACA) ngadto sa Home Development Mutual Fund o Pag-IBIG Fund alang sa ilang aplikasyon sa housing loan.

Nahitabo kini atol sa tigom nga gipahigayon sa Capitol Social Hall nga gipangulohan ni Gobernador Gwendolyn Garcia uban sa mga okupante sa maong mga luna niadtong Septiyembre 25, 2023.

Ubos sa term sa pagbayad sa PAG-IBIG, ang mga homeowners hingpit nga makapanag-iya sa luna sa Probinsya pinaagi sa pagbayad sa housing loan sa PAG-IBIG dayon ang maong ahensya na ang modirekta og bayad sa Kapitolyo.

Ang 93-1 Provincial Ordinance gilangkoban kini sa 51 ka luna nga iya sa Probinsya nga kasamtangang gipuy-an sa mga residente sa dakbayan sa Sugbo.

Ang maong mga luna naa nahimutang sa nagkadaiyang barangay sa dakbayan sa Sugbo apil na ang naa sa Busay, brgy Luz, Lahug, Mabolo, Apas, Lorega, Kasambagan, Capitol Site, Tejero ug Kalunasan.

Ang hepe sa Pag-IBIG Visayas nga si Paulino Talacay maoy personal nga nitabang sa enrollment sa mga okupante. — MEL (BANATNEWS)