Delivery hub alang sa mga riders gisugyot nga tukoron
CEBU, Philippines — Gitinguha karon ni Cebu City Councilor Rey Gealon nga makatukod og delivery hub o waiting area alang sa mga riders sa mga establisamento nga nagtanyag og delivery service.
Sa gisugyot nga ordinansa, gipadayag ni Gealon nga adunay pagdagsa sa electronic commerce (E-commerce) diin dako sab og tabang sa pag tubo sa mga negosyo.
Dugang pa niya, angayan lang nga mohatag ang kagamhanan sa dakbayan sa Sugbo og igong waiting area sanglit gikatahong ang delivery riders wala gidumala sa Labor Code of the Philippines kon dili sa mga digital platform companies.
Uban niining pipila ka mga hinungdan, gisugyot ni Gealon ang ordinansa aron mapauswag ug mapanalipdan ang ilang kahimsog samtang sila nanginabuhi.
“Delivery Riders Hub in an outdoor space shall offer shelter from the heat and rain and shall be well-ventilated, free of charge with parking space and with seating accommodations,” sigun sa gisugyot nga ordinansa ni Gealon.
Atol sa sesyon sa miaging semana sa konseho sa dakbayan sa Sugbo, ang Legal Counsel sa usa sa mga digital delivery companies (Grab) nga si Attorney Samantha Dawn Baluma mipadayag usab sa ilang habig.
Andam nga suportahan sa maong kompaniya ang maong plano sa dakbayan apan ilang nalantawan nga dunay pipila ilabi na sa mga gagmay nga negosyo nga maglisud sa pagtuman niini tungod sa problema sa kagamay sa ilang lugar.
Samtang, si Rogelio Abao, representante sa FoodPanda Riders organization, mipakita sab sa iyang pagpabor sa maong ordinansa. — /MEL (BANAT NEWS)
- Latest
