Ginang, kabit naaktohan sa bana gipadakop

CEBU, Philippines — Gipadakop sa usa ka call center agent ngadto sa mga polis ang asawa niini human naaktohan nga dunay laing kuyog nga lalaki sa sulod sa usa ka motel sa Barangay Banilad sa Siyudad sa Mandaue sayo  sa buntag niadtong miaging adlaw.

Si Police Maajor Mangawang Mallorca sa  Presinto 4  sa Mandaue City Police Office  (MCPO)  miingon nga midangop sa ilang buhatan alas- 4 pasado sa kaadlawon ang 33-anyos nga lalaki ug nagpatabang kay dunay kadulog nga laing lalaki ang iyang 31-anyos nga asawa diha sa maong motel.

Dugang pa Mallorca, nga ang magtiayon mga molupyo  sa Barangay Pakigne, Lungsod sa Minglanilla.

Dali nilang gikuyogan ang reklamante ngadto sa maong motel ug matud pa naaktohan gyud ang ginang ug ang giingong 26-anyos niining kabit nga taga Barangay Kasambagan, Cebu City sa sud sa lawak.

Ang duha nagtingkagol karon sa detention cell ug giandam na ang kaso nga ipasaka batok kanila. — /IBM(BANAT NEWS)