Sunstar, kampiyon sa Cebu Media Volleyball Tournament

CEBU, Philippines — Gilangkat sa Sunstar ang Championship sa Cebu Press Freedom Week "Cebu Media Volleyball and Basketball Tournament 2023, nga gipahigayon diha sa Cebu Eastern College Gym kagahapon Domingo, Sept. 10, 2023.

Kulbahinam kaayo ang duwa tali sa Sunstar ug GMA sa Championship Games apan wala gayud naka pormada ang GMA sa dihang pildi sila sulod sa duha ka set sa Sunstar.

Ang Sunstar naka score og 25 samtang 16 ang GMA.

Ang GMA nahimutang sa 1st place; 2nd place CCTN ug 3rd place ang CDN/DYLA/DYMR/DYRF.

Ang maong duwa subay kini sa pagsaulog sa nagsingabot nga Press Freedom Week nga sugdan sunod adlaw nga Domingo.

Si Kenneth Dwigth Torres sa Sunstar nitug-an nga dako iyang kalipay tungod kay maoy ilang goal karong tuiga nga madepensahan ang ilang kampyonato sa nilabay nga tuig.

Sumala pa ni Torres nga nakuha nila ang kampyonato gumikan sa panaghiusa ug pagtinabangay sa ilang team.

Ang maong kalihukan gihangop sa mga magsisibya ug journalist tungod kay gawas nga nakapasingot sila nagkahiusa na usab sila taliwala sa ilang kakapoy sa adlaw-adlaw nila nga trabahoon.

Mapasalamaton usab ang tanang player sa mga sponsors ug nagpaluyo alang sa kalampusan sa maong kalihukan. — /MEL (BANAT NEWS)