Bag-ong namuyo ilawom sa taytayan gipapahawa

CEBU, Philippines —  Subling gipahigayon niadtong Lunes ang clearing operation diha sa may Kinalumsan bridge sa barangay Mambaling diin nasuta nga aduna na usay nagtukod og mga kubol kubol ilawom sa taytayan habig sa may Natalio Bacalso Avenue.

Ang operasyon gipangulohan sa Prevention Restoration Orderly Beautification Enhancement kon PROBE uban sa City Disaster Risk Reduction and Management Office, Kapolisan sa Mambaling lakip usab ang mga barangay tanod.

Matud pa sa kanhi City Fire Marshal sa Dakbayan ug kasamtangan nga OIC Chief Supt. Aderson Comar, dili mominos upat na ka higayon nga nihimo sila ug clearing operations sa maong dapit sukad sa iyang paglingkod niadtong nakalabay nga buwan sa Abril.

Namatikdan nga adunay dili mominos 13 ka pamilya o 35 ka individual ang nanimuyo sa maong dapit.

Dugang pa ni Comar, nga mga bag-o na ang nanimuyo sa maong dapit human ang kanhi nagpuyo sa maong lugar hingpit na nga gipapahawa.

Atol sa clearing operation sa maong dapit adunay nakuha nga mga gamit alang sa pagsuyop sa ginadili nga drugas, ug wala nay nangangkon nga nanag-iya niini sa mga nagpuyo sa dapit.

Gibutyag ni Comar, nga ila na gayud nga gikural ang maong dapit, aron dili na masudlan ug mapuy-an ang ilawom nga bahin sa taytayan. — MEL (BANATNEWS)