DVMF nagtinguha sa pagtukod og ihawan sa dakbayan

CEBU, Philippines — Gitinguha karon sa Department of Veterinary Medicine and Fisheries (DVMF)nga magbukas og kaugalingon nga ihawan ang siyudad human kadaghanan sa mga pribado nga ihawan nakalapas sa gisitar nga sanitary code. Ang pangulo sa DVMF nga si Dr. Jessica Maribojoc, nibutyag nga sa kasamtangan adunay 19 ka pribadong ihawan sa siyudad diin tulo niini ang sa manok ug 16 ang sa mga baboy.

15 sa maong ihawan ang rehistrado sa City hall apan nasuta nga sagad kanila nga wala makasunod sa mga rekisitos nga posibleng dili makaayo sa konsumidor, hinungdan adunay uban ang pasirad-an ug ang uban palamboon.

Malaumon ang kadagkuan sa DVMF nga kung adunay ihawan nga iya ang siyudad masiguro gayud nga limpyo ang mga karne nga ihawon.

Nagtinguha si Maribojoc nga makigtagbo sa Department of Agriculture Central Visayas alang sa pagtukod unya ug ihawan sa siyudad nga mahimong single A. — MEL BANAT NEWS