Cellphone ni Rhea gustong ipaubos sa forensic exam
CEBU, Philippines — Gitinguha sa Labangon Police Station 10 nga ipaubos sa forensic examination ngadto Regional Anti-Cyber Crime Unit (RACU)-7 ang cellphone ni Rhea Mae Tocmo, ang 19-anyos nga dalaga nga giangkong gipatay ni Simeon Gabutero niadtong Hulyo 16, 2023 sa panimalay mismo sa suspek sa Sitio Kabuwakan, Banawa, Barangay Guadalupe, siyudad sa Sugbo.
Apan giklaro ni Police Major Angelito Valleser, hepe sa Labangon Police Station 10 nga magkinahanglan kini og pagtugot sa pamilya sa biktima sanglit dili pwede isumitir ang resulta sa eksaminasyon kun wala’y pagtugot sa hingtungdan.
Nakig-alayon si Valleser sa igsuon ni Rhea Mae nga si Roche ug nanghangyo nga mopirma og consent nga ipaubos sa forensic examination ang cellphone sa biktima aron maklaro ang estorya nga matud pa naka-chat pa si Rhea Mae anang pasado alas 2 sa kaadlawon pagka Hulyo 17, 2023.
Naa sa kustodiya sa Labangon Police Station ang cellphone sa biktima nga ilahang na-recover gikan sa gibagliyaang tindahan ni Simeon diha sa dalan Colon anang pagka Hulyo 16, 2023.
“Og nagduda mo nga naa pay cellphone si kuan (Rhea Mae) pirma mo og consent kay dili man pwede police maoy mopa examine ani nga wala’y consent sa pamilya,” ni Valleser pa.
Gusto kining himuon sa kapolisan human usa ka Bianca Lee ang miingon nga anang adlawa nga giingong patay na si Rhea Mae nagkontakay pa sila niini.
Gihagit sa kapulisan ang maong witness nga ipakita ang mga ebidensiyang gihuptan niini. Apan kun wala sila’y salig matod pa sa kapulisan mahimong moadto sa ubang law enforcement agency sama sa National Bureau of Investigation(NBI. (BANAT NEWS)
- Latest
