CPPO nipatuman og full alert alang sa Pasigarbo sa Sugbo

CEBU, Philippines —  Gipaubos sa full alert status sugod karong adlawa sa Cebu Police Provincial Office (CPPO) subay kini Pasigarbo sa Sugbo 2023 nga ipahigayon diha sa Dakbayan sa Carcar.

Matud ni Police Major Nolan Tagsip, tigpamaba sa CPPO nga dul-an sa 2,000 ka polis ang ipakatap ug uban pang ahensiya sa gobiyerno nga magbantay sa billeting area sa mga Lungsod sa San Fernando ug Sibonga ug Dakbayan sa Carcar.

Ug sa adlaw sa kalihokan ang maong mga polis ipakatap kini diha sa nagkalain-laing lugar. Nahan-ay na ang security preparation sa kapolisan ug karong adlawa ang kapolisan adunay briefing ug sundan kini sa Agosto 27 diin apil na ang ubang law enforcement agencies.

Gilaoman nga adunay VIPs nga mosaksi sa kalihokan. Panawagan sa kapolisan sa katawhan ilabi na sa mga manguli sa mga lugar sa habagatang bahin sa Sugbo nga mosayo aron dili matanggong sa dagan sa trapiko. Nunot niini, nigikan na ang mga dancer sa Halad Inasal Festival kagahapon sa buntag.

Ang ilang paggikan gisugdan sa Santos nga Misa aron sila giyahan sa pagsalmot sa Pasigarbo sa Sugbo ugmang adlawa. Si Mayor Gerald Anthony “Samsam” Gullas, Jr. nibutyag nga nisayo ang mga dancer aron sa paghimo sa ilang kataposang preparasyon ug blocking.

Gipasalamatan ni Gullas ang mga dancer, props men, choreographers ug sa tanan nga nitabang sugod sa sinugdanan.

Niawhag si Gullas sa Talisaynon nga mohatag og suporta pinaagi sa pagbotar sa contingent number 50 nga mao ang Halad Inasal Festival diha sa Sugbo News Facebook Page. BDB (BANATNEWS)