Isyu sa brgy Sirao gisugyot nga tukion sa konseho

CEBU, Philippines —  Konsehal Pastor ‘Jun” Alcover sa Cebu City Council, mipalanog sa iyang privilege speech may kalabutan sa Ignorance of the Law and Ignorance of the Facts, kini subay sa nahitabong kasikas didto sa barangay Sirao sa nilabay nga semana, diin adunay gihimo nga operation ang mga sakop sa Cebu City Transportation Office sa kabukiran nga sakop sa siyudad.

Sumala pa ni Alcover, aduna siyay nakita nga tulo ka habig sa maong isyu sa Sirao nga mao ang habig sa CCTO, ikaduha ang habig sa mga negosyante ug ikatulo mao ang nahitabong pag-clamp sa mga sakyanan sa mga turista.

Gisugyot niini, angayan tukion ang isyu sa Sirao aron silang mga sakop sa konseho makatabang sa pagpalambo sa mga ordinansa sama sa City Ordinance No. 801 o ang Cebu City Traffic Code No. 1664 kini kabahin sa pag clamp ug mga sakyanan ug uban pa.

Dugang ni Alcover nga angayan usab paminawon ang habig sa mga turista tungod sa ilang pagtuo nga legal ang ilang gi parkingan.

Bisan ug dili siya abogado angay lang adunay balance tali sa tourism industry ug pag implementar sa balaod, diin ang mga tourist spots owner angay mosubay sa lagda ug ordinansa ning dakbayan.

Angayan usab ang mga nagdumala sa siyudad maminaw sa yangongo sa tourist spot owners aron mas molambo pa ang ekonomiya pinaagi sa turismo. MEL (BANATNEWS)