DOLE padayong mosuporta sa NTF-ELCAC

Ang National Task Force to End Local Communist Armed Conflict (NTF-ELCAC) nagkanayon nga ang Department of Labor and Employment (DOLE) sa unang quarter sa tuig 2023 adunay 14,000 ka kanhi rebelde ang natabangan pinaagi sa DOLE Integrated Livelihood and Emergency Employment Program (DILEEP).

Si Undersecretary Ernesto Torres, Jr. executive director sa NTF-ELCAC nagkanayon nga ang 4,810 ka kanhi rebelde ang gihatagan og livelihood aid ubos sa Kabuhayan Program ug laing 9,190 ang gihatagan og emergency employment ubos sa Tulong Panghanapbuhay sa Ating Disavantage/Displaced Workers (TUPAD) program.

Ang DOLE komitado sa pagpanalipod sa batakang katungod sa mamumuo sa kagawasan sa asosasyon samtang gituman usab ang role niini ubos sa whole-of-nation approach sa pagtapos sa local communist armed conflict.

Kini ang mensahes sa DOLE atol sa tigom tali sa National Task Force to End Local Communist Armed Conflict (NTF-ELCAC) alang sa pag-establisar sa kumon nga pagsabot sa kagawasan sa asosasyon ug ang role sa DOLE sa implementasyon sa NTF-ELCAC activities diin nag-unang tumong ang pagtutok sa labor education, livelihood training ug employment facilitation.

Si DOLE Secretary Bienvenido Laguesma nagkanayon nga ang departamento nagpasiugda sa pakigtambayayong sa NTF-ELCAC ug nag-ila sa mga paningkamot sa pagtuman sa mandato sa pagtapos sa mga bangi tali sa lokal nga mga komunista.

Gipaniguro ni Laguesma ang padayong suporta sa departamento ngadto sa NTF-ELCAC ilabi na sa mga programa niini sa labor education, livelihood training ug employment facilitation.  — /BDB (BANAT NEWS)