Mga regular, casual ug JO sa Kapitolyo makadawat og incentive

CEBU, Philippines — Makadawat unya og performance-based incentives karong bulana ang mga empleyado sa Kapitolyo human nga ang provincial board nipasar sa P62.9 million nga supplemental budget atol sa ilang regular session kagahapon sa hapon.

Ang maong appropriation ordinance nga gi-certify sa buhatan sa gobernador nga "urgent" naggahin og pundo alang sa incentive sa mga elected ug appointed nga opisyal lakip na ang regular, casual ug job order employees sa probinsiya.

Si Bokal Glenn Soco, chairman sa committee on finance sa provincial board kinsa maoy nangamahan sa maong ordinansa nagkanayon nga ang maong insentibo pagpasalamat kini sa paninguha ug serbisyo sa mga kawani sa Kapitolyo.

“The office of the chief executive, Hon. Gwendolyn Garcia, recognizes the efforts and exemplary service of the province’s employees during the most trying challenges of super typhoon Odette, COVID-19 pandemic, and the African Swine Fever”, matud ni Soco sa iyang speech kagahapon atol sa regular session.

Si Danilo Rodas, provincial budget officer nagkanayon nga ang mga elected ug appointed officials ingon man ang mga regular ug casual employees ang makadawat og P25,000 nga performance incentives; samtang ang mga job order employees makakuha og P15,000.

Ang incentives mamahimong i-release na sunod semana matud sa Capitol Information Office.

Ang Kapitolyo sa Sugbo adunay sobra sa 4,000 ka empleyado. (BANAT NEWS)