Cortes: Kinasing-kasing nga serbisyo tumong sa iyang administrasyon

CEBU, Philippines — Gipahibalo ni Mayor Jonas Cortes ang kinasing-kasing nga serbisyo sa administrasyon pinaagi sa ipatuman nga mga programa ug proyekto.

Sa iyahang report sa mga Mandauehanon sa State of the City Address (SOCA) gipadayag ni Cortes ang mga gihimo niining pagpaningkamot tungod kay tinguha sa iyang administrasyon ang maayong panggobiyerno alang sa kaayohan sa labing yanong Manduehanon.

Matud ni Cortes nga gibutyag ang resilient economy diin adunay  pagsaka sa business tax collection sa siyudad nga nagpsabot nga adunay pagsaka karong panahona  sa gidaghanon sa mga rehistradong negosyo, daghang trabaho ug ang mga pasidungog sa mga best practices nga gihimo sa siyudad nga nagpadayag sa malambuon nga ekonomiya.

Matud ni Cortes nga gitinguha usab sa iyang administrasyon ang pagbaton sa siyudad og resilient community diin gihimo kini sa mga programa o proyekto nga nagpakabana sa katawhan sama sa caravan of services diin gipadoul ang serbisyo ngadto sa kabarangayan sa paghatag og tabang sa katawhan nga nagsagubang og krisis, naghatag og tabang sa panginabuhi-an uban niini ang kalamboan sa matag komunidad.

Lakip usab niya nga gihisgotan ang mga serbisyo apil ang pakig-alayon sa mga pribadong sektor paghatag og libreng serbisyo’ng medical.

Gitinguha usab niini  ang pagpalambo sa kahimtang sa edukasyon sa kabataan pinaagi sa pagbaton og dekalidad nga eduskasyon, naghatag og suporta sa mga pampublikong tunghaan, nagtabang sa mga estudyante sama sa scholarship grant sa mga kwalipikado nga tinun-an ug ang paghatag og libre nga tuition sa Mandaue City College.

Samtang  sa proyektong pang-inprastraktura maoy iyang gihisgotan ang pagtukod sa Socialized Housing Project aron paghatag og desyente nga pinuy-anan sa mga informal settler, ang pagpaayo sa mga drainage, pagpasemento sa mga karsada, pagbutang og mga street light, ug ang plano’ng pagtukod sa government center aron tapokon ang mga opisina sa gobiyerno diha sa usa ka lugar sa siyudad.

Gitinguha usab niini ang sustainable environment o ang pagpakabana sa  pagpanalipod sa kalikupan, ang paghatag og prayoridad sa Mandaue City isip usa ka environmental-friendly nga lugar nga hamugaway puy-an. BDB (BANATNEWS)