Kasuko, gitan-aw nga motibo sa pagpatay sa negosyante

CEBU, Philippines — Ang personal nga kasuko maoy gitan-aw karon sa kapolisan nga anggulo sa pagpusil patay sa usa ka negosyante diha sa may Purok 2 Barangay San Miguel lungsod sa Cordova.

Si Police Corporal Allan Vercede, desk officer sa Cordova Police Station miingon nga hangtud niining panahona pabilin pa nga wala nila mailhi ang nagpusil patay sa negosyante nga si Glecerio Untal Jr., 42 anyos kinsa gisaka sa iyang panimay og gipusil.

Si Untal usa ka negosyante nga nag buy and sell og motorsiklo.

Suma pa ni Vercede nga padayon pa sila sa ilang follow up operation aron mailhan ang naghimo sa krimen nga gituhuan nga dunay kasuko sa biktima.

Ang biktima nag-inusara lang didto sa iyang panimalay dihang nahitabo ang pagpamusil alas 9 pasado sa gabii niadtong Biyernes, Hulyo 28, 2023.

Ang pag-umangkon nga lalaki sa biktima nga silingan ra niini ang mitug-an nga nakadungog kini og mga boto sa armas apan wa siya masayod kun diin gikan.

Sa dihang iyang gianinaw ang palibot human sa maong mga boto walay siyay nakita hinungdan nga wala na kini niya hatagi og pagtagad.

Si Corporal Vercede miingon nga naalarma na lamang ang pamilya sa pag-abot sa anak nga babaye sa biktima dihang nakita ang amahan nga nagbuy-od sa hawanan sa ilang panimalay nga nagkadugo.

Dali nga gidala sa pamilya ang biktima ngadto sa Cordova Health Center apan gideklarar kini nga patay na sa nag-atiman nga doctor. —/MEL (BANAT NEWS)