Mayor Suan nakigtagbo sa mga bangkero, vendors sa Bantayan Bay

CEBU, Philippines — Mipahigayon og Joint Coordination Meeting si Cordova City Mayor Cesar “Didoy” Suan sa mga bangkero, ambulant vendors ingon man sa mga nanag-iya og Bangka.

Kini aron sa paghan-ay sa mga palisiya nga gisang-at human sa subling pagbukas sa Bantayan Bay.

Naglakip sa mga palisiya kinahanglan ang pagmintenar sa mas limpyo ug presko nga dagat,pagkuha og  Mayor’s Permit nga maoy nakasabotan sa tanan.  Ang mga bangkero dili tugotan nga mo biyahe kun walay Mayor’s Permit ingon man safety Security and Environment Numbering System alang sa mga bangka.

Lakip usab sa mga palisiya mao ang uniform alang sa mga bangkero aron dali na lamang ang pag-ila kanila ug ang pletihan nga 20 pesos matag pasahero.

Gipatuman usab ang pagbutang og trash bin sa matag bangka ug life jacket para sa mga pasahero.

Gawas niini, ang mga ambulant vendor o mga tindero nga walay permaninteng lugar nga mo istar sa Bantayan Bay kinahanglan nga maglukat sila og mayor’s permit ug gigarantiya ang dakung discount nga ihatag nagdto sa mga maong vendors isip tabang sa ilang panginabuhian.

Mamahimo ra usab sa pagtinda sa mga ilimnong makahubog apan imnon lamang kini ngadto sa tindahan nga gipalitan ug dili mamahimong dalhon sa dagat ug ingon man sa sandbar.

Ang tigum nga gipahigayon niadtong Lunes, Hulyo 17, 2023, gitambungan usab nila ni Vice Mayor Boyet Tago, Hon. Remar Baguio, Catarman Barangay Captain Alejandro Aro ug opisyales sa Philippines Coast Guard. (BANAT NEWS)