34 ka sakyanan na impound sa siyudad sa Mandaue

CEBU, Philippines — Na-impound ang 34 ka sakyanan atol sa Joint Anti Criminality Motor Stop Operation ug Road Clearing Operation/One Time Big Time Operation nga gipahigayon sa Traffic Enforcement Unit sa Mandaue Miyerkules, Hulyo 12, 2023.

Ang operasyon nagsugod alas 6 hangtud alas 8:30 sa buntag diha sa F.E Zuelleg Avenue Corner Ouano Avenue Boundary CIP, Barangay Subangdaku dakbayan sa Mandaue.

Kini gipangulohan ni Police Lieutenant Colonel Lirio Coral ubos sa direktang pagdumala ni Police Colonel Jeffrey Caballes, City Director sa MCPO kauban ang RHPU 7, LTO 7, ug mga sakop sa TEAM.

Aduna sila'y 41 ka drayber nga gi-isyuhan og Temporary Operator's Permit (TOP) ug 56 ka Traffic Citation Tickets (TCT) sa maong operasyon.

Tulo usab ka sakyanan ug 31 ka motor ang na-impound.

Gibase kining maong operasyon sa pagpatuman sa RA 4136 o Land Transportation and Traffic Code ug pagpatuman sa City/Local Traffic Violation Enforcement on Environmental Ordinances sa dakbayan sa Mandaue. —Dannahli Pogado (BANAT NEWS)