Puya nga gisud og karton, giabandonar sa tiilan sa imahen

CEBU, Philippines — Usa ka puya nga gisulod og karton ang  gibilin sa tiilan sa imahen sa Sacred Heart of Jesus kagahapon sa kaadlawon ,Hulyo 2,2023 diha sa  Sacred Heart of Jesus Parish, sa Sitio Tangkong sa Barangay Sillon sa Bantayan sa Bantayan Island.

Sumala pa sa kuraparuko sa maong parokya nga si Father Arven Pretila nga ang ilang staff nga ginganlan og “Ate Becky” nangandam na unta sa Santos nga Misa sa simbahan anang adlawa, nahibulong kini pagpasiga sa suga kay dunay karton nga gibilin sa tiilan sa imahen.

Sa dihang gisusi kun unsay sulod, usa diay kini ka buhi nga lalaking puya nga maayong pagkaputos og lampin. Ang puya ila dayong gidala sa Municipal Birthing Center aron mahiling.

“Sa pag-estoryohanay namo sa mga personnel sa birthing center, healthy  baya ang bata,” matud pa ni Pretila sa pakighinabi sa Banat News.

Nanawagan si Pretila sa mga ginikanan sa bata nga mopatim-aw diha sa simbahan sanglit dili lalim nga magdako ang bata nga walay ginikanan.

“Wala man gud ta kahibalo sa ilang rason , pero mohangyo lang ko sa mga ginikanan sa bata nga atoa unta nga barogan ang atong responsibilidad,” saysay pa sa pari.

Matud pa niya kun pananglitan maglisod gyud og buhi ang ginikanan sa maong bata daghan ang pamaagi sa pagpangayo og tabang  apan dili ang pag-abansondar maoy sulbad niini.

“Puwede ra gyud unta sila mangayo og tabang ,  segurado ko nga duna gyuy motabang nila . Dili gyud angayan nga  i-abandonar ang bata,” matud pa ni Pretila .

Nagkanayon si Father Pretila nga kun walay mopatim-aw nga ginikanan, mosubay sila sa legal nga proseso ug usa na niini mao ang pag-endorsar sa bata ngadto Department of  Social Welfare and Development (DSWD). —/IBM (BANAT NEWS)