Task Force Kasaligan gamiton sa pagpangolekta’g buhis

CEBU, Philippines —  Ang kaniadto force multipliers nga gigamit sa dakbayan sa Sugbu pagpatuman sa mga health protocols atol sa Covid-19 pandemic nakakita na sab og laing ginbuhaton.

Ang Task Force Kasaligan nga gilangkuban og mga gradwado sa criminology mao na say gamiton sa siyudad sa gipangusgan niining kampanya pagkolekta og buhis.

Ang TFK dunay 150 ka mga sakop, gitahasan karon sa bag-ohay lang gilusad sa “Strategic Assessment of Your Assets and Worth (SAYAW).

Usa ang TFK sa  gitahasan pagbisita sa kabarangayan aron magpadala sa mga demand letter ug notice sa mga tax delinquents o mga wala pa nakabayad sa ilang buhis ngadto sa siyudad.

Mokabat sa 45% sa mga wala pa mobayad sa buhis ang napadad-an na og notisya sa TFK. Si kanhi  City Treasurer  ug SAYAW program director Ofelia Oliva sa pakighinabi sa Banat News masaligon nga dako og matabang sa koleksyon sa buhis ang TFK.

Hinuon dili lang pagkolekta sa buhis ang ilang buhaton, apil na niini ang paghingusog sa kampanya pinaagi sa pagsayaw diha sa mga satellite tax collection districts sa siyudad aron pahinumdoman ang katawhan sa ilang obligasyon sa pagbayad sa ilang buhis.

Target sa siyudad nga makakolekta og P50 bilyones karong tuiga.

Moabag sab ang Cebu City Police Office alang sa seguridad sa mga sakop sa City Treasurer’s Office matag duna silay bisitahong mga nagmagahi pagbayad sa buhis. — Caecent No-ot Magsumbol, Decemay Padilla ug Rowena Capistrano/IBM