Tulo ka pusher og shabu sikop sa managlahing operasyon

CEBU, Philippines — Nadakpan sa mga sakop sa City Intelligence Unit (CIU) sa Lapu-Lapu City Police Office (LCPO) ang usa ka pusher nga gikonsiderar nga high value individual ug nasakmit ang mokabat sa P748,000 nga kantidad nga shabu.

Si Police Major Aibert Jay Samson, hepe sa CIU miila sa nadakpan nga mao si Ryan Lucernas Bercede, hingkod ang panuigon nga nagpuyo sa Lahug sa Siyudad sa Sugbo.

Matud pa ni Samson nga nakadawat sila og mga taho sa illegal nga kalihokan sa maong lugar nga maoy nakaaghat kanila sa pagpahigayon og buy buy bust operation.

Ang dinakpan nasuta nga bag-o pa sa pagpayuhot og illegal nga drugas apan nabilanggo na kini kaniadto sa kasong murder apan nakagawas human makapyansa sa korte.

Laing duha ka pusher ang nadakpan usab sa CIU sa Mandaue City Police Office (MCPO) ug nasakmit usab ang P68,000 nga balor sa shabu.

Si Police Major Troy John Lamamunan pangulo sa CIU sa MCPO miila sa mga dinakpan nga sila si Kiven Arcilla 27 anyos ug Jay Awitan, 25 anyos nga pulos taga Barangay Tawason siyudad sa Mandaue.

Ang duha ka dinakpan gitanggong na sa detention cell sa MCPO ug giandam na ang tukmang kaso nga ipasaka batok niini. —/MEL (BANAT NEWS)