Poblete mi-resign na isip City Administrator sa Carcar

CEBU, Philippines — Gikompirmar ni Atty. Jose Marie Poblete nga miluwat na siya isip City Administrator sa siyudad sa Carcar.

Apan ang rason sa iyang pag resign sukwahi sa nanggawas nga estorya sa social media nga adunay panagsungi si Poblete sa pipila ka opisyal sa Carcar.

Atol sa programa sa DYSS Super Radyo giangkon ni Poblete nga niadtong buwan sa Marso pa niya gitimbang-timbang ang pag resign human ang iyang asawa ug mga anak mao na ang nihangyo kaniya.

Suma pa ni Poblete nga aduna man tuod silay pinuy-anan sa Carcar pero sila rang duha sa iyang asawa ang nagpuyo ug layo ra usab og mopauli siya dinhi sa dakbayan sa Sugbo.

Apil sa rason mao usab ang iyang gihambin nga sakit nga diabetes.

Asoy pa niya nga niadtong Mayo 15 niya giduso ang resignation letter ngadto ni mayor Patrick Barcenas ug ni epekto kini niadtong Hunyo 1 ning tuiga.

Sa iyang huna-huna, nakasabot ra ang mayor kaniya tungod kay alang raman sab kini sa iyang kaayohan. /MEL (BANAT NEWS)