245 ka tawo sikop sa LLCPO; Nalambigit sa pagpamusil gipangita sa CCPO
CEBU, Philippines — Nadakpan sa kapolisan sa Lapu-Lapu City Police Office (LLCPO) ang 245 ka tawo nga nalambigit sa managlahing kalapasan nga ilang nahimo sa usa ka semana nila nga operasyon nga nagsugod niadtong Mayo 22 hangtud sa Mayo 28, 2023
Si Police Colonel Elmer Lim, direktor sa LLPCO nagkanayon nga sa lima ka hugna nilang operasyon sa ilegal nga drugas napulo ka tawo nga gilangkuban sa upat ka street level Individual ug tulo ka high value individual ang ilang nasikop.
Matud ni Lim nga nikabat ngadto 136 gramos nga shabu nga nagkantidad tanan ngadto sa P924,800 ang ilang nasakmit.
Samtang sa ilegal nga sugal, tulo ka tawo nga ilang naaktohan nga nagtong-it ug nasakmit nila ang P370 nga pusta.
Kabahin sa kalapasan sa lokal nga ordinansa niabot ngadto sa 219 ka tawo ang nadakpan sulod sa 80 ka hugna nilang operasyon nga gilangkuban usab sa 30 ka tawo nga nag-inom diha sa publikong lugar, 50 ang nadakpan sa curfew, 37 ang nanigarilyo diha usab sa publikong lugar ug 96 ang nadakpan sa nagkalainlaing kalapasan.
Samtang sa wanted person sa upat nila ka operasyon upat usab ka wanted person ang nasikop.
Kabahin sa kalapasan sa lagda sa trapiko, nakapahigayon sila og 134 ka operasyon diin 1,249 ka drayber ang nadakpan ug nikabat ngadto sa P759,000 ang nakolektang multa gikan niini.
Sa laing bahin, gitutokan sa Cebu City Police Office (CCPO) ang pagpangita sa mga responsable sa shooting incidents sa Siyudad sa Sugbo.
Sa nilabay’ng Sabado sa gabii nasikop sa sa gipahigayong buy-bust operation sa City Intelligence Unit sa Cebu City Police Office si John Bryan Fernandez kinsa gitumbok nga usa ka notadong hitman ug giingong konektado kini sa usa ka iladong drug lord apan gisusi pa kini sa kapolisan.
Matud ni Police Colonel Ireneo Dalogdog, direktor sa CCPO nga giingong si Fernandez niangkon nga nalambigit kini sa tulo ka shooting incidents sa Cebu City.
Diin ang una niini niadtong buwan sa Marso niining tuiga diha sa Barangay Inayawan, buwan sa Abril diha sa Barangay Suba ug ang ikatulo diha sa Barangay Carreta diin ang biktima usa ka babaye. — Decemay P. Padilla (BANAT NEWS)
- Latest
