Usa ra ka ID sa transaksyon

CEBU, Philippines — Gihangyo sa Konseho sa Dakbayan sa Sugbo ang buhatan sa mayor nga moumol og kamandoan alang sa mga buhatan sa gobIyerno nga nahimutang dinhi sa Dakbayan , ingon ma usab sa mga buhatan sa lokal nga kagamhanan nga usa ra gyud ka government-issued ID ang pangayoon ngadto sa ilang mga kliyente sa nagkadaiyang transaksyon.

Sumala pa sa nangamahan sa maong sugyot nga si Konsehal Rey Gealon subo kaayo palandungon nga dunay ubang tawo nga  maglisod sa  ilang transaksyon gumikan kay usa ra ang ilang government ID ug ang mga buhatan mangayo og duha.

Panahon na matud pa nga tul-iron kini ug dili angayang lisod-lisoron ang katawhan.  Sa pagka-ngalan nga dunay sila’y giproseso,seguradong importante gyud kini nga butang.

Dugang pa sa konsehal nga serbisyo man unta sa gobyerno ang gipangayo busa subo palandongon nga dunay uban niini ang dili katagamtam kay usa ra gyud ang ilang government ID.

“Daghan sa atong kaigsuonan ang walay ID gumikan sa kakabus diin wala silay paagi nga makakuha og daghang ID. Kung naa man gani, sagad nila adunay usa lang ka ID maong dili nato lisod-lisuron ang ilang tinguha nga makatagamtam sa kaayohan nga ipanghatag sa syudad og sa ubang mga batakang serbisyo gumikan lang kay dili kaabot og duha ang ilang ID,” saysay pa ni Gealon.

Nihangyo siya sa executive department nga mohimo og pamaagi aron dili maglisod ang ubang tawo nga duna ra’y usa ka government ID.

“There is a need for the Office of the Mayor to issue an order addressed to all government offices located within the territorial jurisdiction of the City of Cebu, including those under the Cebu City Government and national offices and agencies, mandating that only one (1) valid government-issued ID should be required from clients transacting business in their respective offices,” dugang pa niya. — IBM (BANATNEWS)