Sabong i-regulate sa Talisay, tigbakay dakpon gihapon

CEBU, Philippines — Gipahibawo sa konseho sa Dakbayan sa Talisay nga naaprobahan na ang ordinansa nga nag-regulate sa pagpahigayon og tari sa buwangan sa siyudad.

Si Konsehal Rodi Cabigas, chairman sa committee on Games and Amusement nibutyag nga gihimo nila ang lakang aron sa paghatag og kahapsay sa huna-huna sa mga sabongero nga dili na sila pakalitan og ronda.

Gawas pa niini makakita sab og saktong bulohisan ang kagamhanan sa dakbayan.

Apan giklaro ni Cabigas nga ang tigbakay wala malakip sa iyang ordinansa busa siguro gyud siya nga dakponon kini.

Nagkanayon ang konsehal nga wala maghisgot og tigbakay ang iyang ordinansa kundi ang legal nga buwangan lang.

Si Police Lt. Col. Randy Caballes, hepe sa kapolisan sa Talisay nagkanayon nga ang lisensyado nga buwangan lang ang makapahigayon og sabong.

Hinuon siya nitataw nga ang tigbakay wa gyud kini gitugot.—  IBM ( Banat News )