Bay walk patrolyahan og polis aron walay mag-estambay

CEBU, Philippines — Gibutyag ni Police Colonel Ireneo Dalogdog, direktor sa Cebu City Police Office nga patrolyahan og polis ang bay walk area diha sa South Road Properties.

Kini aron dili na mobalik ang mga tawo nga mag-estambay ug maghimo og mga istraktura diha sa lugar human sa gihimong clean-up activity sa mga personnel sa Cebu City Hall sa lugar diin adunay nakuhang mga drug paraphernalia.

“Ang atoang mayor si Honorable Michael Lopez Rama nag-lead niadtong last week, April 12, si Mayor gyud mismo ang nagtan-aw didto sa area kauban nato ang taga Department of General Services sa LGU atoang mga kapolisan nag-visit gyud didto sa area para lang gyud dili na mobalik ning didto magtambay ning mga tao unya hugaw kaayo”, padayag ni Dalogdog.

Nasayran nga gawas sa paglimpiyo sa maong dapit gipintalan usab kini ug aron masiguro nga walay mamalik diha sa lugar aron mag-estambay ug maghugaw-hugaw adunay polis sa Waterfront Police Station nga mag-roving sa lugar.

Alang kang Dalogdog nga maayo nga gilimpiyohan ang lugar tungod kay basin unya og diha magsugod ang mga ilegal nga kalihokan.

Ug kon aduna lang gihapo’y mobalik sa dapit badlungon kini sa kapolisan ug kon masuta nga adunay gihimong ilegal nga kalihokan dili magpanuko sa pagdakop ang kapolisan. (BANAT NEWS)