Nagkawot sa septic tank sa Talisay posibleng pasakaan og kaso
CEBU, Philippines — Posibleng mapasakaan og kaso ang nagkawot ug ang nagpakawot sa yuta nga himuong septic tank didto sa sitio Sayaw Laray, Barangay San Roque, Dakbayan sa Talisay nga maoy hinungdan sa kamatayon sa duha ka managsuon niadtong Dominggo.
Si Police Lt. Col. Randy Caballes, hepe sa kapolisan sa Talisay nibutyag nga aduna na silay pangalan sa tag-iya sa yuta ug kun ilang makit-an nga adunay pagpabaya sa ilang bahin mahimo nila nga mapasakaan og kaso.
Una niini, si Edelisa Ignacio, 26 anyos naghilak nga niatubang sa mga tigbalita ug nipadayag nga nangita sila og hustisya sa kamatayon sa iyang duha ka anak.
Si mayor Gerald Anthony “Samsam” Gullas nibisita sa haya sa duha ka biktima nga nagpangidaron og 6 ug 7 anyos ug siya mipasalig sa mga ginikanan nga andam sila nga motabang sa pagpangita kun kinsa ang manubag sa disgrasya.
Gipasalig sa mayor ang pag-abag gikan sa legal office sa siyudad ug nihatag usab siya og personal nga ayuda ug nipasalig sab sa hinabang gikan sa siyudad.
Nasayran, sila si Mark Emman Llamedo, 6 anyos ug si Nathaniel Llamedo, 7 anyos kuyog sa ilang mga ig-agaw nga nagduwa og tabanog ug naabot sa gikawot nga yuta nga napuno sa tubig aron manghimasa apan natagak sila.
Nakasaka ang duha ka bata apan nahabilin ang magsuon nga di kamao molangoy.
Walay gibutang nga ali ang gikawot nga yuta nga himuong septic tank hinungdan nga dali ra nga nakasulod ang mga bata. — MEL (BANATNEWS)
- Latest
