Kapitolyo nipasaka na og kaso batok sa BAI

CEBU, Philippines —  Hingpit na nga nipasaka og kaso si Gobernador Gwendolyn Garcia batok sa pipila ka opisyal Bureau of Animal Industry (BAI) kagahapon.

Kalabot kini sa giingong pakyas nga pakig-alayon sa BAI ngadto sa Probinsiya sa Sugbo kabahin sa mga protocol ug polisiya mahitungod sa African Swine Fever (ASF) ilabina ang padayon nga pag-ihaw "culling policy" nga gipatuman sa BAI.

Si Garcia pinaagi sa mga abogado niini nga sila si Neil Ediza ug Isis Capangpangan sa Provincial Legal Office maoy niduso og kaso batok nila ni Paul Limson, Samuel Joseph Castro, Joshua Cruz, Dr. Miriam Lopez Vito ug Dr. Daniel Ventura, Jr. ngadto sa Office of the Ombudsman-Visayas.

Kalapasan sa Akta Republika  3019 kun “Anti-Graft and Corrupt Practices Act”, Sections 2C, 25B ug 27 sa Akta Republika 7160 kun “Local Government Code of 1991” ug Articles 19, 20, ug 21 sa  New Civil Code ang gipasaka nga reklamo sa Kapitolyo batok sa maong opisyales.

Si Limson mao ang director sa BAI samtang si Castro mao ang deputy program coordinator,  si Cruz mao ang BAI-coordinator sa ASF, si Vito ang Regional Veterinary Quarantine Station, si  Ventura mao ang coordinator sa ASF sa Department of Agriculture-7.

Gusto ni Garcia nga manubag ang maong mga respondents tungod sa giingong walay koordinasyon ngadto sa probinsiya sa pagpatuman sa mga polisiya niini sa ASF nga giingong adunay negatibo nga impact sa hog industry sa Probinsiya sa Sugbo.

Ang BAI nga ubos sa Department of Agriculture adunay polisiya nga ang mga baboy nga anaa sa 500-meter radius gikan sa "infected area" sa ASF ang kinahanglang pang-ihawon paglikay nga makatakod ngadto sa laing baboy.

Matud ni Garcia nga ang BAI pagkayas nga makapahigayon og "differential diagnosis" aron pag-validate kon ASF ba gyud o laing matang sa impeksiyon ang sakit sa baboy sa pipila ka lokalidad sa probinsiya sama sa Dakbayan sa Carcar.

Si Garcia nagkanayon nga ang pagpatay sa mga baboy didto sa Barangay Can-asujan, Dakbayan sa Carar niresulta sa dako nga epekto sa panginabuhian sa mga nagbuhi og baboy sa maong dapit.

Si Garcia niluwat kini og kamandoan niadtong Marso 14, 2023 aron ipahunong ang "culling" nga polisiya sa DA-BAI.

Laing memo ang giluwatan ni Garcia nga nagpahimangno sa national government agencies hilabina sa DA nga mo coordinate sa LGUs sa mga ipatuman nga programa ug polisiya niini. —BDB (BANATNEWS)