Mga eskrimador mopasundayag atol sa Kadaugan sa Mactan

CEBU, Philippines —  Tinguha ni Lapu-Lapu City mayor Junard “Ahong” Chan nga mopasundayag atol sa Kadaugan sa Mactan karong Abril 27, 2023 ang mga eskrimador sa Sugbo isip pagpasigarbo sa Eskrima nga giisip nga martial art sa mga Pilipino.

Lakip sa tinguha sa mayor mao nga maila ang Eskrima sa Guinness Book of World Record pinaagi sa pasundayag niini nga salmotan og daghang mga tawo.

Suma pa ni Chan nga ang eskrima maoy gisakbang nila ni Datu Lapu-Lapu batok sa mga langyaw nga gipangulohan ni Ferdinand Magellan.

Sa press conference gipadayag sa mayor nga gusto niya nga ang mga eskrimador sa Sugbo mopasundayag sa ilang kahanas atol sa reenactment sa Victory of Mactan karong tuiga ug maila sa Guinness Book of World Records ubos sa kategoriya nga "Biggest Play of Eskrima."nga anha pagahimoon sa baybayon nga maoy dapit nga nahitabo usab ang gubat sa Mactan. 

Gitinguha nila nga makaabot og dyes mil ka tawo ang mosalmot sa kalihukan.

Gitug-an usab ni Chan nga si Datu Lapu-Lapu nga giila nga unang bayani nga Pilipino ang giila usab nga eskrimador diin ang ilang kahanas sa paggamit sa sundang ug garote sa pagpakig-away maoy ilang gisakbang batok nila ni Magellan nga nagdala og mga kanyon uban sa nagpangidlap sa kahait nga mga espada.

Nasayran ang Filipino Martial Art ang nalakip na usab kini sa curriculum, sa Department of Education (DepEd) sa Siyudad sa Lapu-Lapu.

Apil sa tinguha sa siyudad nga motambong sa kalihukan karong tuiga mao si presidente   Ferdinand "Bongbong" Marcos, bise presidente Sara Duterte ug mga sakop sa gabinete. — MEL (FREEMAN)