Kongresista Gullas top 3 sa survey sa RP-Mission

CEBU, Philippines — Nabutang sa top 3 si Kongresista Rhea Gullas sa gihimo nga survey ngadto sa mga kongresista sa Central Visayas kinsa nipakita og maayong performance.

Ang survey gihimo sa RP-Mission and Development Foundation Inc.

Ilang gibasehan ang lihok sa kongresista sugod sa Pebrero 25 hangtud sa Marso 8 niining tuiga. Parehong nabutang sa unang pwesto sila si kongresista Duke Frasco sa ikalimang distrito sa Sugbo, Pablo John Garcia sa ikatulong distrito sa Sugbo ug Chiquiting Sagarbarria sa ikaduhang distrito sa Negros Oriental.

Ang ikaduha mao si Kongresista Edu Rama sa ikaduhang distrito sa Siyudad sa Sugbo.

Ug si Gullas ang nahimutang sa ikatulo kinsa nakakuha og 88.6 porsyento. (Gabriel C. Bonjoc/BDB)

Lalaki patay human nabiktima sa hit and run sa Tuburan

Patay ang 22 anyos nga lalaki human nabiktima sa hit and run sa may Barangay Poblacion 8, Tuburan, Cebu niadtong Martes sa kadlawon.

Ang nakalas naila nga si Nataniel Jemina, 22anyos, ulitawo, taga barangay Baliwagan, Balamban Cebu.

Samtang ang naangol naila nga si Paulo Ouano, 29 anyos, ulitawo, taga Barangay Buanoy, sa mao gihapong lungsod.

Basi sa initial nga imbestigasyon sa kapolisan ang mga biktima giingong naglakaw daplin sa dalan, sa dihang usa ka driver sa multicab color green nga nagbiyahe sa maong lugar padung sa habagatan, ang nakadumbol sa mga biktima.

Dali nga gidala sa tambalanan ang mga biktima apan si Jemina nakutloan gayud sa iyang kinabuhi tungod sa grabeng kadaut nga naangkon niini samtang ang usa nagpabilin pa sa tambalanan.

Wa pa mailhi ang driver nga naka-igo sa mga biktima nga daling misibat human sa hitabo ug gibiyaan ang mga biktima. (BANATNEWS)