12 lang ka barangay sa Mandaue adunay fire brigade
CEBU, Philippines — Si Fire Chief Inspector Arnel Abella, direktor sa Mandaue City Fire Office (MCFO) nibutyag nga sa 27 ka barangay sa siyudad 12 lang niini ang adunay kaugalingon nga fire brigade.
Matud ni Abella nga ang pagbaton og fire brigade nagpasabot kini nga ang barangay nakapalit og ilang kaugalingong fire truck hinungdan nga nakaumol kini og fire volunteers nga gibansay sa kabomberohan sa pagtubag sa alarma sa sunog.
Hinuon ang pipila ka mga barangay sa siyudad ang nag-umol na usab og Community Fire Auxiliary Groups (CFAG) kinsa ang mga sakop niini nabansay usab sa kabomberohan pagtubag og alarma sa sunog sa ilang tagsa-tagsa ka mga barangay.
Giklaro ni Abella nga ang maong grupo sa CFAG nga nabansay sa pagtubag sa sunog sagad gamit nila ang fire extinguisher o tubig nga makapugong sa pagsilaob sa kayo.
Si Abella nagkanayon nga ang mga fire brigade ug CFAG dako kaayong og ikatabang sa mga higayon nga mahitabo ang alarma sa sunog.
Giklaro ni Abella nga mahinungdanon nga ang CFAG ug ang mga fire volunteer sa sa matag barangay ang mapaubos sa mga pagbansay-bansay sa Bureau of Fire Protection aron matudloan kini sa tukmang pamaagi sa paggamit sa mga kahimanan alang sa pagpawong sa kayo. (/BDB) (BANAT NEWS)
- Latest
