Serbisyo nga medical gipahigayon atol sa heart month

CEBU, Philippines —  Gipahigayon sa Sugbo kagahapon ang nasudnong selebrasyon sa 50th national heart month diin gidalit ngadto sa katawhan ang mga libreng serbisyo.

Gipangulohan ang maong kalihokan sa Philippine Heart Association ug gipahigayon diha sa SM Seaside ang libreng konsultasyon ug ang ubang doktor niini naggikan sa Sugbo ug Manila.

Atol sa maong kalihokan adunay gihimo usab nga nga cardio pulmonary resuscitation (CPR) training ngadto sa mga indibidwal.

Matud ni Dr. Luigi Pierre Segundo, PHA director ug Dr. Karen Caudor, sa PHA Cebu Chapter nga dili angayan nga balaliwaon kon adunay mabati nga mga paghuot sa dughan aron malikayan ang komplikasyon niini ug mahibaw-an dayon ang tinud-anay nga estado sa lawas.

Ang mabati nga paghuot sa dughan usa sa mga sintomas sa sakit sa kasing-kasing.

Gikampaniya karon sa PHA ang mga saktong  buhaton nga malikay sa sakit sa kasing-kasing ug usa na niini mao ang pagkaon og utanon, prutas ug isda .

Matud nila ni Segundo ug Caudor nga angayan usab likayan ang grabe nga pag-inom og ilimnong makahubog ingon man ang pagpinagarilyo.

Ang maong klase nga bisyo makahatag og kadaot sa nagkadaiyang parte sa lawas hangtud nga maabot kini ngadto sa kasing-kasing.

Importante usab nga mogahin og oras sa pag-ehersisyo matag adlaw. (BANAT NEWS)