28 ka armas nga walay linsensiya naimbargo; 17 ka sugarol sikop sa LLCPO
CEBU, Philippines — Niabot ngadto sa 28 ka armas nga walay lisensiya ang nahipos sa Lapu-Lapu City Police Office (LLCPO).
Si Police Colonel Elmer Lim, director sa LLCPO nagkanayon nga ang pipila sa mga armas nga ilang nahipos ilang nakuha atol sa 85 ka Oplan Katok nga ilang gihimo.
Ang Oplan Katok ilang gihimo diha sa mga panimalay nga ilang natala nga expired na ang lisensiya sa gihuptan niining armas.
Ang maong gidaghanon sa mga armas nga nakuha 21 niini ang expired na ang lisensiya ug pito ang gikan sa mga suspetsadong pusher nga ilang nadakpan.
Matud ni Lim nga ang paghipos sa mga walay lisensiya nga mga armas aron mapugngan ang krimen.
Si Lim niawhag sa mga naghupot pa og mga armas nga walay lisensiya sa pagtahan diha sa ilang buhatan alang sa safe keeping.
Sa laing bahin, niabot ngadto sa 17 ka sugarol ang nadakpan atol sa managlahing operasyon sa kapolisan sa LLCPO.
Giingong ang 10 sa maong mga sugarol ang naaktohan sa mga polis nga nagduwa og hantak, lima ang naaktohan nga nagpahigayon sa ilegal nga swertres ug ang duha nalambigit sa tigbakay.
Ang kapolisan nakaimbargo og P2,770 nga kwarta nga giingong pusta sa mga sugarol nga nabiyaan tungod kay naglumba og panagan dihang niabot ang mga polis. — BDB (BANATNEWS)
- Latest
