Exhibit sa mga sinuwat ni Don Vicente Rama buksan karong adlawa

CEBU, Philippines —  Buksan karong adlawa, Pebrero 17, 2023 ang exhibit nga dunay kalabotan ni Don Vicente Rama sa kalibutan sa publication.

Ang maong kalihokan gitawag og Bag-ong Kusog nga gilangkoban sa iyang periodicals.

Ilusad ang exhibit diha sa Cebu City Hall Legislative Lobby.

Pipila sa sikat niya nga novels mao ang Donya Marcosa (1947), Ang Silot Ni Bathala (1948), ug ang iyang translated version sa Doce Pares de Francia (1930).

Sa taho nga gipaambit sa Cultural and Historical Affairs Office (CHAO), si Vicente Rama nagsugod sa iyang kinabuhi sa pagmantala niadtong 1906. Nagsugod siya sa pagsulat sa Kauswagan, usa ka inadlaw nga papel nga gipatik sa pinulongang Bisaya, nga gipakaylap gikan sa 1912 ngadto sa 1914.

Niadtong 1915, gisugdan niya ang pagpatik sa Nueva Fuerza, usa ka mantalaan nga gisulat sa Kinatsila, ug ang katugbang niini sa pinulongang Bisaya, Bag-ong Kusog, niadtong Mayo 2, 1915. Ang naulahi nahimong kampeon sa mga Sugbuanon ug nahimong independente nga papel niadtong 1923.

Ang Bag-ong Kusog adunay daghang mga artikulo nga nagpahayag sa mga opinyon ni Vicente Rama sa mga serbisyo sa gobyerno ug mga ahensya niini, mga panghitabo karon, mga taho, ug uban pa.

Naglakip usab kini sa usa ka seksyon sa mga buhat sa literatura.

Ang publikasyon nahunong atol sa pagsugod sa Ikaduhang Gubat sa kalibutan niadtong 1941.—  MEL (BANATNEWS)