“Botika sa Barangay” umolon sa lungsod sa San Remigio

CEBU, Philippines — Gilaraw karon sa konsehal sa lungsod sa San Remigio nga si Alfie Reynes-Corominas nga mag-umol og programang “Botika sa Barangay” aron mahatagan ang mga nanginahanglan og tambal sa kabarangayan nga dili na kinahanglan nga mobyahe og layo.

Suma pa sa konsehal kinsa mao usab ang chairperson sa committee on health sa konseho nga ubay ubay sa ilang mga barangay ang nahimutang sa bukirang bahin.

Plano niya nga butangan ang maong mga botika sa barangay og mga tambal sa sip-on, hilanat, ubo, allergy ug uban pa.

Moumol ug mga pagtuon si Corominas aron masuta ang gidaghanon sa mga tambal nga gamiton sa maong programa.

“naay uban nato nga kaigsuonan nga layo intawon kaayo og lugsungon aron lang mangita og tambal, pinaagi sa botika sa barangay dili na sila kinahanglan nga mobyahe pa og layo,” matud pa ni Corominas .

Matud pa niya nga importante nga hatagan og dinalian nga pagtagad ang mga tawo nga maayo dayon sa gihambin nilang sakit.

Ang San Remigio dunay 27 ka barangay ug masaligon si Corominas nga mahatagan ug katumanan ang iyang tinguha uban sa dakong suporta sa kaubanan niya nga opisyales.

Dugang pa ni Corominas nga gawas sa botika sa barangay duna pay nakalinya nga health programs sa lungsod sa San Remigio. /MEL (BANAT NEWS)