18 LGUs mikanselar sa klase tungod sa dautang panahon

CEBU, Philippines — Dili momenus 18 ka mga lungsod ug syudad sa Probinsya sa Sugbo ang nisuspenso sa klase sa tunghaan kagahapong adlawa samtang gidid-an pagbiyahe ang mga barkong gikan 250 gross tons paubos tungod sa kabati sa panahon nga nasinati sa Sugbo.

Sa gihipos nga datus sa Provincial Disaster Risk Reduction and Management Office (PDRRMO) apil sa mga nisuspenso og klase mao ang Talisay City, Argao, Barili, Alegria, Asturias,  Minglnilla, Cordova, San Fernando, Naga Cit,  Sibonga, Compostela,  Aloguinsan,  Santander, Samboan, Consolacion, Ginatilan ug Sta Fe. Ang lungsod sa Sogod apil pud sa nisuspenso og klase.

Gawas sa pagkanselar sa klase, gisuspenso pud sa Philippine Coast Guard ang byahe sa mga gagmay nga barko kagahapong adlawa diri sa Sugbo ug sa mga silingang                     probinsya.

Ang nagkadiayang sa substations sa PCG –Camotes, Negros Oriental, Northern Cebu, Southern Cebu ug Eastern Bohol  ang niluwat og “notice to mariners” nga nagkanayon nga tungod sa gale warning nga giissue sa PAG-ASA  dala sa Northeast Monsoon, suspendido ang byahe sa mga sakayan pandagat o barko nga 250 gross  tonnage o paubos.

Mabalik ra ang byahe kon moayo na ang panahon.

Base sa rainfall advisory sa PAG-ASA kagahapon sa alas 5 sa hapon, gipaubos sa yellow warning level ang Lapu-Lapu City, Cordova, Mandaue City, Cebu City, Talisay City, Consolacion, Liloan, Compostela, Danao City, Carmen, Catmon, Minglanilla, Naga City, San Fernando, Carcar City, Sibonga, Argao, Aloguinsan, Pinamungahan, Toledo City, Balamban, Asturias, Tuburan, Barili, Ronda, Dumanjug ug  Alcantara.

Nagpasabot kini nga moabot sa 37, 500 ngadto sa 75, 000 ka drums /square kilometer sa ulan ang masinati sa maong mga lugar tungod kini sa nasinati nga shear line nga nasinati sa Sugbo.

Padayon pa sab nga nagkuha og impormasyon ang Philippine Coast Guard Central Visayas kung pila ka mga pasahero ang na stranded sa mga pantalan dili lang sa Sugbo apan apil na sa ubang dapit sa rehiyon subay na sa pag suspenso sa mga biyahe.

Sa Barangay Tingo, Olango Island sa Lapu-Lapu City, Petty Officer 2 Renaldo Cabig, Coastguard Substation Commander sa Olango Island miingon nga dunay upat ka mananagat nga mibalik sa agi human nasudlan og tubig ang ilang pumpboat. —Decemay Padilla, Rowena Capistrano (BANATNEWS)