20 ka sakyanan sa gobiyerno naisyuhan og citation tickets
CEBU, Philippines — Kapin sa 20 ka government vehicles ang naisyuhan og citation ticket gumikan sa pagpataka og babag niini diha sa bike lanes.
Nasayran nga adunay gihimong subsob nga operasyon ang Sugbo Bike Lanes Board niadtong Miyerkules.
Base sa taho sa KTV News ni Ramil Ayuman nga gipahimug-atan sa maong board nga walay exemption sa ilang operasyon bisan pa nga sakyanan sa gobiyerno ang nakalapas sa lagda.
Matud ni Bernard Maraasin, executive director sa Sugbo Bike Lanes Board nga ang ilang operasyon kalabotan kini sa ilang "Opan Ratsada sa Kalsada, Padayon ang Disiplina" nga dungan sa hingpit nga implementasyon sa City Ordinance 2408, Section 8 kun "Obstruction to the Bike Lanes".
Ang maong mga sakyanan giingong gibiyaan ug gipasagdan lang diha sa karsada .
"Mohatag og pabor ang among opisina kong ang red plate/government vehicle gigamit sa oras sa trabaho o operasyon sa tagsa-tagsa nga opisina, pero kong inyo lang kanang biyaan ug pasagdaan nga walay balidong rason dili kami magduha-duha og dakop sa mga driver niini ",tipik sa mensahe sa Sugbo Bike Lanes Board.
Makamulta ang violator og P500.00 alang sa unang kalapasan.
Bukas ang buhatan sa SBLB gikan sa alas 8:00 sa buntag hangtud sa alas 5:00 sa hapon diha sa SBLB Operation Center, Cebu City Sports Institute, Barangay Sawang Calero.
Alang sa ikaduhang kalapasan adunay multa nga P1000 samtang sa ikatulong kalapasan, P1500 ang multa o pagkapriso nga dili mo ubos sa unom ka buwan. Giawhag sa kagamhanan sa siyudad ang motorista nga respetohon ang bike lanes pinaagi sa pagtuman sa mga lagda niini. (BANATNEWS)
- Latest
