Pagparehistro sa mga mokuyog sa fluvial procession, deadline karon
CEBU, Philippines — Gipahibawo sa Philippine Coast Guard (PCG)-7 kagahapon sa buntag adlaw nga Lunes niabot na sa 76 ka sakyanang pangdagat ang nakapa-rehistro sa ilahang buhatan aron moapil sa Fluvial Procession karong Enero 14, Sabado.
Sigon sa tigpamaba sa PCG-7 Lt. Jr. Grade Stephen Pacgaliwagan kaning 76 nga nagparehistro gilangkuban pumpboats, tourboats, pasaheroang barko, yati, ug tugboats.
Padayon nga nanawat ang Philippine Coast Guard og registration sa mga gustong moapil sa maong kalihukan nga kabahin sa kapistahan sa Balaang Bata. Sr. Sto. Niño.
Gibutyag ni Pagcaliwagan nga ang Task Force Coast Guard District Central Visayas Sinulog 2023 magpahigayon og final briefing sa mga motambong sa fluvial procession.
Apil niini ang mga kapitan sa barko, skippers ug uban pa aron mahatagan og guidelines sama sa registration, unsay mga gidili nga dad-on ug uban pa, gikatakda kini nga himoon sa Enero 12, Huwebes sa Coast District Central Visayas sa Pier 3.
Sa mga gustong moapil sa fluvial procession ang PCG-7 mangayo sa mga mosunod nga rekisitos Passenger Ship Safety Certificate, Certificate of Public Convenience, Manning Certificate nga dunay clear copy sa ID sa boat captain o operator alang sa barko nga ubos sa 35 gross tonnage.
Ang mga barko nga 35 gross tonnage kinahanglan moduso og Cargo Ship Safety Certificate ug Manning Certificate uban sa clear copy sa ID sa boat captain o operator.
Karong Enero 11, adlaw’ng Miyerkules dunay dry run nga himoon ang PCG-7 uban ang Basilica Minore del Sto. Niño alang sa fluvial procession. Karong adlawa sab ang deadline sa pagdawat sa mga magpa-rehistro.
Pinaagi sa dry run matan-aw ng daan ang mga posisyon sa matag partisipante sa prosisyon apil na sab ang pagandam sa seguridad ug kaluwasan sa tanan karong Sabado. (BANATNEWS)
- Latest
