Pagbutang og park sa mga brgy giplano sa siyudad

CEBU, Philippines — Ang pag-establisar og mga park sa kabaranggayan maoy usa sa mga target sa kagamhanan sa Siyudad sa Sugbo sulod karong tuiga.

Suma pa ni Konsehal Jocelyn Pesquera kinsa mao ang nangulo sa Cebu City Tourism Commission nga usa ka maayong butang nga dunay lugar ang mga tawo sa usa ka komunidad kun diin mahimo sila nga magkatapok o magka-bonding.

Usa sa mga rason sa maong lakang mao ang pagbaton og dugang lamas sa kalidad sa kinabuhi.

Nahimong kabahin sa maong plano mao ang pagahimoon nga restorasyon ug beautification sa Veterans Cemetery diha sa Barangay Labangon.

Dili kini maoy unang higayon nga gipaubos sa beautification ang usa ka semeteryo.

Niadtong Oktubre sa niaging tuig, gihimo ang landscaping sa Doña Pepang Cemetery diha sa Barangay Carreta diin tipik kini sa tinguha nga himuong heritage park ang maong dapit.

Nagkanayon si Pesquera nga suportado ni Mayor Michael Rama ang mga programa niya alang sa pag-ugmad sa turismo sa Dakbayan. Kun dunay mga park ang kabaranggayan, tataw nga madugangan usab ang hugyaw nga spots alang sa mga bisita.

Ang Dakbayan sa Sugbo adunay kasamtangang tulo ka dagko nga parks nga gilangkoban sa Plaza Independencia, Fuente Osmeña ug Plaza Sugbo. (BANATNEWS)