Minilyon nga kantidad sa shabu nasakmit atol sa buy-bust

CEBU, Philippines —  Nikabat ngadto sa P7.3 milyones ang balor sa shabu nga nasakmit atol sa gipahigayong buy-bust operation sa kapolisan sa Sawang Calero Police Station niadtong Martes sa gabii diha sa Sitio Mahayahay, Barangay Calamba, Dakbayan sa Sugbo.

Nangulo sa maong operasyon si Police Major Francis Renz Talosig, hepe sa Sawang Calero Police Station.

Nadakpan sa kapolisan ang subject sa buy-bust nga si Juhndel Abanid alyas "Tiyo",

residente sa Barangay Labangon, usa ka high value individual. Giingong nikabat ngadto sa

usa ka kilong shabu ang nasakmit gikan sa suspetsado.

Matud ni Police Colonel Ireneo Dalogdog nga ang suspetsado gipaubos nila og duha ka

semana nga surveillance.

Nasayran usab sa kapolisan nga ang suspetsado nadakpan kini niadtong Pebrero, 2018

gumikan sa pagpamaligya ug paghupot og ilegal nga drugas apan nakagawas kini niadtong

Nobiyembre sa samang tuig human nipaubos og probation.

“Unfortunately yun nga kagabi he engage again sa illegal activity at nakuha sa

kanyang possession and control ang kaning 43 packs of white crystal substance believed to

be methamphetamine hydrochloride or shabu with an estimated weight of 1 kilo gram or 1, 075

grams with standard drug price of P7.3 million”, butyag ni Dalogdog.

Ang area of operation suspetsado gilangkuban sa Barangay Pasil, Suba, Duljo,

Labangon ug Calamba apil ang mga duol nga barangay.

Samtang gidayeg sa director sa Police Regional Office-7 Brigadier General Jerry

Bearis ang kalamposan sa Cebu City Police Office ug matud niya nga dili sila mohunong

hangtud nga makuha ang tinubdan sa drugas.

Sa laing bahin, pinalahi ang paagi sa pagpamaligya og shabu sa usa ka 42-anyos nga

babaye tungod kay online ang pag-order ug i-deliver kini pinaagi sa motorsiklo.

Ang suspetsado mao si Jerelyn Labiaga Daan, taga Pandanon Island, Getafe

Bohol ug kasamtangang nagpuyo diha sa Barangay Lipata, Lungsod sa Minglanilla.

Ang iyang kuyog mao si Christopher Diaz Jaca, 45-anyos, taga Barangay Pasil,

Siyudad sa Sugbo.

Nasikop si Daan sa grupo nila ni Police Captain Elwood Ebona sa Drug Enforcement

Unit niadtong Martes sa tungang gabii diha sa Barangay Lagtang sa maong Siyudad.

Sa gihimo nga transaksiyon nakuhaan og shabu si Daan nga nitimbang og 10.1 gramos

nga nikabat ngadto sa P68,680 ang kantidad.

Base sa imbestigasyon sa kapolisan si Daan giingong mobaligya sa iyang regular nga

customer.

Human sila magkasabot sa kantidad sa shabu siya mismo ang mohatud niini gamit ang

iyang motorsiklo.

Samtang sa Dakbayan sa Mandaue, nasakmit ang armas ug shabu gikan sa suspetsdong pusher nga nadakpan usab atol sa buy bust  operation sa kapolisan sa Presinto 5 sa Mandaue. (BANAT NEWS)