Nanunggab og 4 ka tawo nasikop sa siyudad sa Danao

CEBU, Philippines — Suspetsado sa pagpanunggab ang nadakpan sa hot pursuit operation sa kapolisan diha sa Barangay Taytay, Siyudad sa Danao alas 12 sa tungang gabii niadtong Sabado, Oktubre 29, 2022.

Ang nadakpan mao si Mike Benitez Cruz, 20 anyos nga molopyo sa Barangay Puente sa Lungsod sa Carmen.

Si Police Lieutenant Roel Tanza, deputy chief sa Consolacion Police Station maoy nangulo sa hot pursuit operation kauban sa mga sakop sa Special Weapon and Tactics (SWAT) Team.

Matud pa ni Tanza nga nahitabo ang pagpanunggab alas 9 pasado sa gabii sa miaging Sabado atol sa bisperas sa fiesta ni San Narciso nga patron sa nahisgutang lungsod.

Segun sa pasiunang pakisusi sa kapolisan giingon nga naglakaw lang ang mga biktima dihang kalit nga gipanunggab sa suspetsado sa way igong hinungdan.

Ang mga biktima giila nga sila si James Anthony Landesa Gomez, Peter John Calzada Esconde;  Jaylord Bilonghilot ug Andrey Gepuit Bueno nga pulos hingkod ang panuigon ug mga molopyo sa nahisgutang dapit.

Dali nga gidala sa tambalanan ang mga biktima human makaangkon og samad sa ilang lawas hinoon luwas ra ang ilang kahimtang. — /MEL (BANAT NEWS)