Street vendors ihatud-kuha sa siyudad

CEBU, Philippines — Mga libud-suroy nga anha magkatulganan sa aseras ini og kagabii dili tanan wala gyuy kaulian kondili tapulan lang gyud mamauli ug anha nalang mangatulog kon diin sila naninda o nanginabuhi ini og adlawan.

Kini maoy gibutyag sa Officer-in-Charge sa Department of Social Welfare and Services Dr. Ester Concha sa mga tigbalita. Matud niya kining mga street dwellers dili gustong manguli kay dili gustong mabiyaan ang ilahang negosyo.

Karon dunay giandam ang siyudad nga mahimo nilang katulgan nga hamugay ug luwas, nahimutang kini tupad sa NOAH Complex sa South Road Properties.

Giklaro ni Concha nga dili mabiyaan ang ilahang negosyo kay kun ma-rescue sila kuhaon sila og bus ihatod sa limpyo ug luwas nga katulganan dayon inig ka buntag o kaha kaadlawon kuhaon sila pagbalik ug ihatod kun asa sila gikuha.

“Kung ang ilang problema is tulugan lang naa tay tulugan ika-offer, dili lang sila sa dalan and we already have mga regular nga inig abot sa bus mosakay na sila didto but very few and hopefully ang uban makasabot sad, duna paman gyuy gahi kaayo, so hopefully regular sad ang atong pagkuha ug paghatod og balik nila,” asoy ni Concha.

Giangkon ni Concha nga dakong hagit nila ang pagpasabot aning mga night dwellers apan nanghinaot kini nga sa hinay-hinay masabtan nila ang tumong sa Kagamhanan sa siyudad sa Sugbo ug maanad ra.

Ang paghipos kanila usa sa nakitang pamaagi aron malimpyohan og maayo ang kadalanan sa dakbayan. —IBM (BANATNEWS)