Pagbutang og iClinicSys sa siyudad giuyonan sa konseho

CEBU, Philippines — Gitugotan sa Cebu City Council si Mayor Michael Rama nga mopirma og Memorandum of Agreement (MOA) uban sa Department of Health (DOH) Region 7 alang sa pagbutang ug pag-access sa dakbayan sa Integrated Clinic Information System (iClinicSys).

Si Konsehal Jocelyn Pesquera nipalabang og resolusyon atubangan sa konseho kalabot niini.

Ang City Health Department (CHD), sa usa ka sulat, nihangyo kang Pesquera og resolusyon nga magtugot sa mayor nga makapirma ug makasulod og MOA sa DOH-7 bahin sa pagbutang og access sa iClinicSys.

Ang iClinicSys usa ka electronic medical record ug health information system nga magamit sa local government unit (LGU) alang sa health services sa pagtabang sa pagdumala sa pasyente demograpiko, medikal nga kasaysayan, diagnosis,treatments, medications, laboratory requests, ug ang pag- generate  sa gikinahanglan nga datos alang sa LGU.

Si Pesquera miingon nga ang City Legal Office (CLO), nakakaplag sa mga probisyon sa gisugyot nga MOA nga hapsay, ug ang mga termino ug kondisyon niini nahiuyon sa balaod, moralidad, maayong kostumbre ug polisiya sa publiko.

Sama sa gihatag sa draft MOA, usa sa teknolohiya nga solusyon ang gihimo sa DOH pinaagi sa Epidemiology Bureau (EB), Disease Prevention and Control Bureau (DPCB) ug Knowledge Management and Information Technology Service (KMITS), nga gipatuman sa punto sa pag-atiman.

Ang iClinicSys, usa ka reference model alang sa electronic medical records ug health information system alang sa primary care facilities nga nagtagbaw sa mga kinahanglanon sa Philippine Health Insurance Corporation alang sa benefit packages pinaagi sa capitation ug DOH reporting nga mga kinahanglanon lakip na ang national health data standards.

Lakip sa mga tahas ug responsibilidad sa LGU mao ang paghatag ug pagmentinar sa gikinahanglan nga mga impormasyon ug komunikasyon (ICT) nga gikinahanglan sa pagpatuman sa sistema, magtudlo ug labing menos duha ka personahe nga maoy responsable sa pagsulod ug pag-upload dayon sa datos.

Kinahanglan usab nila nga isumiter ang gikinahanglan nga datos ug statistical reports ngadto sa DOH ug PhilHealth.

Samtang, ang DOH-7 motabang sa LGU sa pag-instalar ug pag-access sa iClinicSys pinaagi sa paghatag og mga resources sama sa system installer, version updates, ug soft copy sa software operations manual.

Ang rehiyonal nga buhatan maghatag usab og pagbansay alang sa teknikal nga kawani sa LGU kon unsaon paggamit ug pagdumala ang iClinicSys. MEL (BANATNEWS)