Pagtinda og pagkaon sa virgin island sa Bohol gidili na
CEBU, Philippines — Gidili na sa Local Government Unit sa Panglao sa Probinsya sa Bohol ang pagpaninda ug pagkaon ingon man ubang tourism activities gawas lamang sa sightseeing sa inila kaayo nga Virgin island.
Si Mayor Edgardo “Boy”Arcay sa Panglao nipahibalo sa iyang social media account nga ang LGU niaprobar na sa mga rekomendasyon nga nigawas atol sa emergency meeting nga gihimo niadtong Martes uban sa DILG ug Municipal Tourism Council.
Gituki sa maong tigum mao ang giingong overpricing sa pagkaon nga gibaligya ngadto sa mga mobisita sa virgin island.
Giaprobahan sa Mayor ang proposal nga sugod Agosto 3 ang dinalian nga pagsira sa maong isla alang sa mga food vendors ug ubang tourism activities apan magpadayon ang island-hopping apan limitado lang ngadto sa sightseeing.
Ang maong lakang, nahitabo human nag trending ang usa ka post sa netizen nga niabot ngadto sa P26mil ang ilang nabayran sa pagkaon nga ilang gi-order alang sa 19 ka tawo.
Ang mayor niuyon usab sa sugyot sa Municipal Tourism Council nga magpahigayon ug food street o night market diha sa town plaza alang sa mga vendors nga apektado sa maong desisyon.
Ang mga opisyal sa Panglao nagtinguha usab karon sa paghimo ug lakang aron ma regulate ang mga presyo sa pagkaon alang sa mga turista.— MEL (BANATNEWS)
- Latest
