Shimura napiling presidente sa LMP Cebu
CEBU, Philippines — Si Daanbantayan Mayor Sun Shimura mao ang napili pagka-presidente sa League of Municipalities of the Philippines (LMP) Cebu.
Ang mga mayor ubos sa LMP nagkauyon sa pagpili kang Shimura nga maoy mangulo sa ilang grupo atol sa ilang gipahigayon nga eleksiyon diha sa Seda Hotel Central Bloc kagahapon.
Si Shimura maoy nihulip kang kanhi Liloan Mayor Christina Frasco nga karon mao na ang tourism secretary.
Nagpasalamat si Shimura sa pagsalig nga gihatag sa kaniya sa mga mayor sa Probinsiya sa Sugbo.
“I was very shocked with the motion… Nevertheless, dako gyud akong pasalamat sa atong mga mayors for their full trust and confidence on having me as their next president”, matud ni Shimura atol sa phone interview sa mga reporter kagahapon.
Apil sa mga napili nga opisyal mao sila si Consolacion Mayor Teresa “Nene” Alegado isip vice president for internal ug external vice president si Sogod Mayor Lissa Marie “Monyeen” Durano –Streegan.
Ang bag-ong secretary mao si Barili Mayor John-John Garcia; treasurer si Borbon Mayor Noel Dotillos; auditor si Alcantara Mayor Fritz Lastiomoso ug press relations officer si Dalaguete Mayor Ronald Cesante.
Ang mga bag-ong board of directors gilangkuban nila ni Sibonga Mayor Lionel Bacaltos; Argao Mayor Alan Cesaldo , Balamban Mayor Ace Binghay , Medellin Mayor Joven Mondigo Jr. , Carmen Mayor Carlo Villamor, Cordova Mayor Cesar Suan, Moalboal Mayor Titing Cabaron ug Tabuelan Mayor Raul Gerona. —/BDB (BANAT NEWS)
- Latest
