Kahugpongan sa mamumuo mopahigayon og Black Saturday protest

CEBU, Philippines — Ang mga kahugpongan sa mga mamumuo sa Siyudad sa Mandaue gikatakdang  mopasiugda og Black Saturday protest karong adlawa isip pagkondenar sa kamatayon ni Stephen Corilla sa iyang gitrabahoan nga pabrika sa Siyudad sa Mandaue.

Ang maong kahugpongan sa mga mamamuo gikangkuban sa Kilusang Mayo Uno, Institute for Occupational Health and Safety Development, Alsa Contractual Cebu, Alyansa sa mga Mamumuo sa Sugbo, Center For Trade Union ug uban pa.

Nasayran nga ang Department of Labor and Employment niluwat og work stoppage batok sa maong pabrika human sa nahitabo ni Corilla.

Si Corilla nagtrabaho kini diha sulod sa pulverized machine diin kalit kini nga niandar nga maoy hinungdan sa kamatayon niini.

Nunot niini, mohatag og legal assistance si Mayor Junard Ahong Chan sa pamilya ni Corilla.

Base sa post ni Chan sa iyang Facebook page nagkanayon kini nga iyang tabangan ang pamilya sa biktima kinsa nangayo karon og hustisya.

Ang pamilya ni Corilla niduso og reklamo ngadto sa buhatan sa National Bureau of Investigation (NBI)-7.Si Chan nibisita kini sa haya ni Corilla nga nahimutang diha sa Barangay Pusok, Dakbayan sa Lapu-Lapu.

“Misaad kita nga maoy mokuha’g abogado nga maoy motabang sa pamilya ni Stephen sa pagkab- ot og hustisya,” padayag ni Chan sa post niini sa iyang Facebook Page.

“Akong gisaad sa pamilya nga isip mayor wala akoy gahom sa pagpalik sa kinabuhi ni Stephen, apan buhaton nako ang tanan aron kahatagan og hustisya ang iyang kamatayon”,  dugang ni Chan. BDB (BANATNEWS)