BAC giawhag pagduso og report sa mga kontrata sa siyudad

CEBU, Philippines — Giawhag sa Cebu City Council ang Bids and Awards Committee (BAC) nga moduso og summary report karong Mayo 11, 2022 sa tanang kontrata nga gisudlan sa Siyudad alang sa tuig 2020 ug 2021. Pipila ka importanteng detalye nga gipangayo mao ang pangalan sa mga contractor, contract amount, ug nahibilin nga balanse sa bayranan sa mga contractor.

Si Konsehal Nestor Archival maoy nagpasiugda sa maong awhag nga giuyonan usab sa mga kaubanan niya sa konseho.

Nagkanayon si Archival nga mag- assess usab kini sa performance ug mga nabuhat sa administrasyon kun maghisgot na og mga kontrata ingon man usab ang gitagana nga pundo niini.

Ang konseho mihangyo usab sa City Budget Officer Marietta Gumia, City Treasurer Mare Vae Reyes, ug City Accountant Jerome Ornopia nga mosumitir og joint summary report sa kinatibuk-ang naaprobahan nga budget alang sa tuig 2020 ug 2021.

Gawas sa tinuig nga budget, giingong duna pud sila'y napasar nga mga supplemental budget.

Samtang gipaubos sa lima ka adlaw nga seminar ang mga miyembro sa City’s Bids and Awards Committee (BAC) aron pag-refresh sa nakat onan sa revised implementing rules and regulation sa Government Procurement Reform Act (GPRA).

Si Tienan Donabel Gabaldon-Tan sa Presidential Management Staff ang nituki kabahin sa Procurement 101, apil na niini ang key features sa GPRA kun Republic Act 9184 ingon man ang procurement organization. 

Nagpahinumdom si Gabaldon-Tan sa BAC personnel nga angayan siguraduhon ang fairness procurement process.

Gihimug-atan niini nga ang GPRA’s governing principles nga mao ang public monitoring, accountability, competitiveness, transparency, ug streamlined process. —Decemay P. Padilla/MEL (BANATNEWS)