Nalimtan pagpawong nga aircon nagbilin og P1.3M danyos

CEBU, Philippines — Labing menos P1.3 milyon ang danyos nga gibilin sa sunog nga miigo sa dining area sa usa ka pasilidad nga gipanag-iya sa usa ka Seventh Day Adventist Church nga gituohang nagsugod sa usa ka air-conditioner.

Nadawat sa Cebu City Fire Office (CCFO) ang alarma sa sunog mga alas 8:46 sa gabii niadtong Sabado, Abril 23,2022 sa 112 Gorordo Avenue, Barangay Kamputhaw, dakbayan sa Sugbo.

Giisa sa unang alarma ang sunog mga alas 8:56 sa gabii ug nakontrolar alas 9:07 sa gabii. Gideklarar kini nga fire out alas 9:14.

Si Fire Officer 3 Emerson Arceo Investigator, miingon nga ila unang gitan-aw ang posibilidad nga aircon ang hinungdan sa sunog.

Matud ni Arceo, posibleng nibuto ang split-type aircon unit nga dili sama sa window-type nga air conditioner, ang split-type mahimo lamang i-off pinaagi sa remote control.

“Inig off nato,magtuo ta nga na off na kay motingog, naay times na if motingog lang atong bantayan, kay wa gyud diay siya na off. Nagtuo lang ta ingon-ana,” ni Arceo.

Niini, gipahinumdoman ni Arceo ang publiko nga sa pagpalong sa maong mga sa aircon units kun dili na gamiton.—Iris Hazel Mascardo/IBM

Solusyon sa problema sa pabahay giwadwad ni Lacson

Gipadayag ni presidential candidate Panfilo ‘Ping’ Lacson nga duna siyay lig-on nga estratehiya aron masulbad ang dugay na nga problema sa kakuwang og pinuy-anan ilabi na sa mga kabus nga pamilya.

Sa iyang pakigpulong didto sa Rizal, usa ka residente sa Antipolo City ang nagpatabang kaniya kay nabalaka nga papahawaon sa iyang gipuy-an ug dili pa niini kaya nga mopalit og kaugalingon nga balay ug yuta.

“Madaling sabihin, ‘lahat kayo ‘pag nanalo ako, tiyak na may tahanan.’ Hindi po namin pwedeng gawin ‘yun, kinompute (compute) po namin. Kapag isinakatuparan natin 5.3-million houses, P500-billion isang taon sa budget. Kakainin po ‘yung ating national budget,” sigun ni Lacson.

Gipasabot sa batikang senador ug independent presidential candidate, nga usa ka solusyon sa problema mao ang pagwagtang sa ugat sa kurapsyon ug saktong paggamit sa buhis sa katawhan aron magahinan og pundo ang mga proyekto sa pabahay sa gobyerno.

Aron kini matuman, gisugyot ni Lacson ang pag-umol og mga polisiya nga makadugang sa kita sa gobyerno.

Gawas niini makatabang usab og daku ang iyang iduso nga Budget Reform Advocacy for Village Empowerment (BRAVE) program alang sa malungtaron nga solusyon tungod kay mahatagan na man og gahum ug pundo ang mga lokal nga gobyerno ug maatiman ang panginahanglan sa ilang mga konstituwente.

Samtang misaad usab si senatorial aspirant ug kanhi Agriculture Secretary Emmanuel ‘Manny’ Piñol nga suportahan niya ang administrasyon ni Lacson pinaagi sa pag-umol og mas lig-on nga balaud alang sa mga informal settlers o sa mga tawo nga dugay na nga nag atiman og yuta apan wa pa mahatagi og titulo. (BANATNEWS)